დაო დე ძინი
ავტორი ლაო ძი
მთარგმნელი ედემ იზორია
წინგი პრიველი
I
დაო დობთოლორეთკონ,
დაო ვეჸიდ უთირუ;
ჯოხო ქიგებდვითკო,
ჯოხო ვეჸიდ უთირუ.
უგმურაგადუ რე გოჭყაფა:
ცა დო დიხაში.
მენდული ჯოხოში
დია რე ირი რენიში.
ჭეშმეტო:
მიქჷთ მიკუ კობეფი,
თოლორუ დაო ფორილიში;
მით მიკუ კობეფქ,
თოლორუ დაო ჸოფიერებაში.
ართიე ჟირხოლოშ გოჭყაფა,
ჯოხოეფიე შხვადოშხვა.
თე გოჭყაფას
ფორილი ჯოხო.
ფორილი ფორილიში
პონი რე ირი უგმურჩქინუში.
.
II
მუჟამს ქიჩინეს ცაშთუდონც
სქვამი სქვამი რენ:
გერჩქინდ უსქვამურქ;
მუჟამც ქაჩინეს ცაშთუდონც
კეთილი კეთილი რენ:
გერჩქინდ ბოროტებაქჷთ..
ჭეშმეტო:
ჸოფიერი დო უჸოფობა ართმაჟიას ეიორჩქინანც;
მონკა დო ქექე ართმაჟიას ექიმინჷნც;
გინძე დო კუნტა ართმაჟიას გინოწონჷნც;
მაღალი დო დაბალი ართმაჟიას ღუნენა;
ხონარეფიშ აკოწყორუა აკონწყუალას ორთ;
წიმი მალ დო უკახლე მალ ართიანს დოჸუნც;
თეშენრე:
ართოთილისმა უქიმინ რე დო ორთ;
ართოთილისმა უსისანდჷ რე დო ბზუკოლჷნა;
თეშენ ერჩქინდუ ირი რენი;
ერჩქინდ დო ირგანშე იყარებუ (ყარენც);
ართოთილისმა ვაპატონენც ინეფს;
ირფელც ეთმოქიმინჷნც დო ვამინჯენც ექიმინელც;
ირს აყარენს დო
ვაშულენც აყარებულც;
ვაშულენც სურქიმინელც.
მიკისურენც საქვარეფც დო
ვებობოხ დო
ირი თის დოჸუნც
III
თილისმას ვაგათ დოჸონი
დო კათას მალასუ ნირზი;
ვაგადიადათ ძვირფასი მოკონი
დო მილასუ ხირუა კოჩეფ შქას;
ვამწარჩქინათ ზალიმიშ ემართინაფალი
დო ვეგარგანჩუ კათაშ გური.
თეშენრე:
ართოთილისმა მაფენც დო
კათას ტანც უჩოლანც;
ტანც უჩოლანც დო
ხორცის გუთმუფშანც;
უსიაფარენც წვადილც დო
უტკილცალენც ძვალეფც.
ირო თეურე მინჭაფუ.
კათას რჩქინა დო ნებეფი
ვანარღჷდან,
მარა რჩქინელეფი
ვაბედჷდან ქიმინობას.
უქიმინობას დორჩქალა მოუღ.
ართოთილისმა ვექჷნც;
იქჷნც დო უქიმინუ რე;
უქიმინუ რე
დო ირი რენი თის დოჸუნს.
IV
დაო ჩოლერიე;
ჩოლერიე, მარა
გჷმორჩქიანას
ეშუწირუ რე.
ო მუ თომბა რე დო ფორილი:
დაო რე მუმა ირი რენიში;
დაო ვაყარენც აყარებულც;
დაო დაკვანწანც ერია-მორიას;
დაო ამურუჟენც რწკინობას;
დაო იკორობანც მორჩილშე უმორჩილაშის(ჭიჭეშე უჭიჭაშის).
ო, მუ უწკონდარაშიე!
გოჭყაფაშე მივარვალ დო:
იროიანიე.
მა ვამიჩქ სოურეშე ერჩქინდ თიქ,
მათინა მიჩქ
ცაშ მაფობუას აწოჸუნცჷნი.
ცა დო დიხა:
ვაღუნენც კოჩმოჸოროფობას:
ართიე თინეფშო
რენი ირიში ვარდა ჭაშ ჯოღორი;
ართოთილისმა
ვაღუნენც კოჩმოჸოროფას,
ართიე თიშო
კოჩი ვარ ოსური, ვარ ჭაშ ჯოღორი.
ასა-გასა ონირე ცაში დო დიხაში.
ო, მუჭო გჷ ჭკადუშ ომბარეშის!
ინა ჩოლერიე,
მარა ეშუწირურე.
მუთ უმოს ეფშარე ჩოლერობათ,
თით უმოსის ყარენც.
მუთ უმოსის ყარენც,
თით უმოსო მითმიბშაფ ჩოლერობათ.
მით უმოსის ღარღაჩანც
იმარცხებ:
ზიმობუა რე ირიშ ჯინჯი დო ნერჩი
დააფიქსირეთ თქვენი აზრი