ნიკოლოზ ბარათაშვილი "მერანი"
მთარგმნელი ედემ იზორია
მეურს, მიჭუმინ, უშარ-უკვალეთ ჩქიმი მერანი,
კჷნ ეკმორჩხვიანს, შურუბადო უჩა ყვარანი.
გოლი მერანი, რულაშ ხურგა ულიებურო
დო მეჩი ქაქალს ფირქი ჩქიმი უჩათ ლებური.
გოკვათი ქარი, გაჸათი წყარი, გეგნიჟუმინი კირდე ქარსამი,
გოლ გოჭუმინი დო დამკუნტარი ოლუ დღალეფიშ შურ ხეს ქვერსემი.
ვამუთხილუა ჩქიმ მაფურინჯე, ვართი სინჩხეს დო ვართი ხანდარას,
ვეშიცოდუა უშულადირე, დუდგოწირილი სქანი ბედაური.
მუ რე ოჸუნეს მუვეშორიდა, ვაბძირე ჩქიმი ემარჩქინალი,
დუოკორდ მანგი, მაჸალესჷ-და, საჩილოშ ხონარ ვამორჩქილანი.
სო მასერასი თექ გომითანდას, თექ ორდას დიხა ჩქიმ ეიორჩქინუ
ხვალე მურიცხის ალმათხოზინეს, გურიშ ნოფული ჩქიმ უჩქუდას.
გურიშ ჭუა დო ჸოროფაშ ნაშთი მებჩე ზღვაშ ლებას,
ხანგურ ნჭაფას დო მეხვამლაფას, სქან სასვებას.
გოლი მერანი, რულაშ ხურგა ულიებურო
დო მეჩი ქაქალს ფირქი ჩქიმი უჩათ ლებური.
ვარ ვადიმთხორა ჩქიმი ოჸუნეს, კინოხონეფიშ სასაფლა-თისჷ,
ვარ ვამინგარას გურიშ ჸოროფილქ, გურჭვილ ჩილამურქ ვეგმაჭვათასჷ.
მოვირვილერი მინდორემს შქასჷ, გომტახუნს უჩა ყვარან საფულას,
დო ერეხელი ძვალეფს დოტებულს, ზარით, ღირინით, დიხას დოფულუნს.
ჩილამურეფიშ მანგიორ ღურელს, ცაშე ცჷმეფი ქიგმოცვათანა,
დო სანათესოშ რგუალაშ გამათ, უჩა ძერეფი ქიგმოთვალანა.
მეუ, ქოფურინი ჩქიმი მერანი, ხურგა ჭარაში გეგნონიჸონი
აიშა მა ის ვევემონიდა, ანწი მუშენი ოკო ვემონე.
მურე ბღურიდა, მა უმინჯურო ოხერ-ნავარო
ვავაშქურინექ თიში ცაცლარს ტერ მოზისზირე.
გოლი მერანი, რულაშ ხურგა ულიებურო
დო მეჩი ქაქალს ფირქი ჩქიმი უჩათ ლებური.
ვარა ხომ იშენ უბადოთ ვეიშურს, დუდგოწირილი შურიშ კვათინი
დო ქუდოსკიდუ ჩქიმი მერანი, თი ულიუ შარას ქიგვოჩართინი,
მუდა ჩქიმ უკულ ჩქიმ ოჯიმალეს, გელექინისჷ შარაშ სიძნელექ,
ოდო ლექერთო, მუშ რაშიქ თინას, ჭარაშ წოხოლე განკუჟუმინას.
მეურს, მიჭუმინ, უშარ-უკვალეთ ჩქიმი მერანი,
კჷნ ეკმორჩხვიანს, შურუბადო უჩა ყვარანი.
გოლი მერანი, რულაშ ხურგა ულიებურო
დო მეჩი ქაქალს ფირქი ჩქიმი უჩათ ლებური.
დააფიქსირეთ თქვენი აზრი