დემონი - მიხეილ ლერმონტოვი
1
უგუძიცებუ დო მუნაფილი
გილაფურინუნდ გაგუგებული,
გმარჩქინეშე გოჯოგაფილი
დემონი შურით შეწუხებული.
საუკუნეფიში კჷდათ ფულირი,
გთმაშინედ ბორჯი ულირი,
სქვამი ლანდეფი თი ჯგირი ბორჯიში
ის ოწოხოლე აწაფაფუდეს
დო იში შურცუ დო იში გურცუ
დუღა ფუნაფილს ალჷმაბუნდეს.
ქერუბიმ რდჷნი შჷდ თი ფარანი,
გილაფურინჷნდ ჟი ცას თამამი
დო მუკმალაფე სქვამი მურიცხიში
ვარკდ ფერაფი, ვართი -სალამი.
მუჟამცთი თინა რჩქინაში შქირენულე,
აშანჩურუნდუ უთანჯო ნირსის,
თოლც ოჸუნუანდ დიხაში რსიალც,
გალაჸაფუდუ თუთა-მურიცხის,
ანდაფა არზეფი გურც ვაგურდუნი,
ისჷ წვალება ვაუჩქდ მუ რდჷნი,
დაჩხირო ვანტუდუ ეჭვიში გოლოფა,
უღუდუ რწმენა, უღუდუ ჸოროფა,
ის ბედნიერც მურდჷნი ვაუჩქდ
გურიში მაჸვილარი უჩა მოწყინა
დო ხოლო ბრელი... ბრელი ხოლო შხვეფი,
ნამუშით უჭირც ამდღა გოშინა.
2
ბრელი ხანი რე ბინა ვაუღუნი,
ცალიორი არეს გილეჸვანთჷნი,
მუთუნი მიზანი ვარდ ასე იშო
გილეგაგანდ აშო დო იშო.
მიშეს ბორჯეფი, ბორჯეფს გეჸუნდეს,
ალმექოსუდეს სოდგენი წკვარამც,
წუთი წუთის გჷდ, დღა გჷდ დღასჷ
წანა-წანას, ფარანი ფარანც,
დო თე ქიჸანას დემონი პატნენდ,
ორთინუანდჷ მუჭო ოკოდჷნი,
უბადოს თასჷნდ ჟირხოლო ხეთჷ
მუს გილაგორუნც მი რე ოცოდჷნი.
დო მუშჷ ხელობაშჷ ხეში მაჩულარქ,
ჰა, მუ ხანი რენ მითაქ ეურჩქინდ
დო ეშმაკური მუსი საქმეშათი
ანწი დემონცჷ გურქ მოუწყინდ.
3
სამოთხეში რინას მოჩილათირი,
დემონი ცაშე გითონთხაფილი,
კავკასიაში თირამი გვალაში ჟი
გინმოფურინნდ გური ხარცქილი.
აჰა, თიში თუდო რჩინჷ ყაზბეგი,
მუჭო ალმასი თეში რწკინჷნდჷ,
ჩხორია, თიში ენაჩხილეტა,
მაჯინეს თოლემც მოუჭკირჷნდჷ.
ანთასი ფათჷ კიჩილ-წკუმონტილ,
ემერი ჩქდჷ შორც დარიალა,
დო სოდგარენ წკვაფანც, თოლი ვანჭუნჷ ფერც,
თერგი მეხორცქჷდ თიში თუდო ყალა...
1923 წელი. ივლისი
დააფიქსირეთ თქვენი აზრი