ჩქიმი რინქ გეკმაჯოგ
შხვაში რინაში მაჯინეს,
მინშო გვალო ეკონია,
მინშო ფალო კვაჯი რექ.
ანთას მითინი მომინდურუ
მართალიში ჩიებაქ,
უჯგუში ჭყანა დამითხინუ
ჩინებულიშ ჩინებაქ.
სო რე ჯვეშიშ ორანეფი,
საწმოხონო, ნანდულეფი,
მუმულშორო გეყიანა
უმუმლუ დადულეფი.
ფართო თოლით იბჯინექ,
მიბლენ მოკო უმულებუ,
ყვარილცალო ყვანტალანა
მუმულიშნერი მუმულეფი.
ვორწყექ შური მათირუნა,
ვეგიაპალუ ხანდას მარდი,,
იშენით ვაგმაგინ
მუშოთ ოკო ხანგას ვარდი.
სო იღანს თიშ პეულსუ,
ხეს ატენს ნამუ ბოროს.
ჯას ფურცელი ვასქილად
მელენ ჭალეში ნაბორას.
დიდ ფაშაში ნარზიეფუ
მუს მომღანა თი ხალათი,
მიქ ოკო ბზუკოლანი,
ხასლას მის ვეხოლათ.
ართიანს პის უსქვამანთ,
ელუაფირს შხვაში წვირეს,
ქომჩქუდასუნი მიქ ბზაკვეს,
ლეტაშა მიქ მოწურეს.
ჩქი ენერი ვავორდით,
შხვანერი რდუ ჩქინ თოლონჭე,
ასე ვამიჩქ გეწკურილქ
გეფორილი სო ევონჯე.
მარქვალქ ხოლო გეტყვეპერ
მონჭვაში ვეგეზოჯუათ,
მუჭო აკანო ვორწყექ
ოჭმარეში ონჯუას.
გინნაღელ ჭირქ ქეკინწკარ
აბორჯებული ბორჯალას,
ვორწყექ ასე შხვა იჭყანს
ჩქინ ღალუემს ღორჯალას.
ჩქიმი რინაქ გეკმაჯოგ
შხვაში რინიში მაჯინეს,
მუ ჭყანაში მენდულემს
მუთუნქ ვაგმახარჯინეს.