გერეფი
მარაშინა თუთაშ ტიბუ ტკუჩი სერიე, ძიუთ ჩქუნა მურიცხეფი დო ექე-აქო ოჭვიტინანა მუნაფილ ცაშე. ლიბუე დო დვირა ოღეკეშჷშა გიშმაულარ ჩაბაქია ხვერით ფორილ რზა, ნამუსით ჯაგვი მეჸუნს. ჯაგვის ჟირ აღნერდუა გეხე-მორჩილ მუმალონამ ჟინოსქუაშ ცირასქუა დო გიმნაზიარი ბოშკოჩი. ოშა-გოშა მუნაფეფს ქანთი ვალუა ეთმურძანს ზომაშა მარულე გაქანდარებულ ჟირ მოხანდე ცხენს, კოფეს გემახვეჯი გოჟვაბალერი ოსარამ ბოშკოჩის ხუჯეფს დო ჩიხაგიორთჷმს მერქას გექთარჩქინანს ჸვანალუაშ ჩოლერ ლაფაჩეფს დო მიკეიან ჯაბურ ტყას. გოღა ონჯუას ბობოთი, ღვარაფი, ჯოღორეფიშ წკაფალი დო წკუმინი ირჩქილედუ ოფუტეს: მუჟამს ხულეფს ოსერშენდესჷნ, სარკოთ გოჰაჯიებულ გერჷქ ართ ოზეს შხურს ყორყელ გითონქილჷ დო დახე ქიხვამილუ-ჯოღორეფიშ ლალუას ქომოცუეს ყაზაყეფჷქ ბიგებამო ხეს, გერს ქომაჭიშუეს დო ხასლეფჷგილაფარდაგელ უშურე უხამელი პიჯჷშე გეკწოსოფეს. ასე ცირასქუა ნერვიულო კარკაცანს, ერძამილ სგერჭულიშ ღერეფს უკმელას ოჸოთანს დო ხაფაჩით ბელენანს:
-მოშქურუ გერეფჷშა!
სგერჭულიშ ღერეფ ეთმიორძანა ბოშკოჩიშ სვირთალ, მუზმათუნ ნჯგელა ღვას დო ცირასქუაშ ებორბონჩელ ღვანწკმაღალ სქვამ პიჯჷს. ძღაბის უკრაინიშულ ყალდაშა ქოგუკირაფუდუ ჭითა ქიცა. ჭითა ჩინთიშ ჟვაბალიათ გურეშაჭკირილ მუკოქვენჯის ჯგირო მუჩქუ კვარკვალია, გეგუთია კისერი. თინა გორქილ ჯაგვის იქანცუ დო ერძამილ სგერჭულიშ ღერეფს გინმაჸათანს უკმელაშა, ითამ ვაგინაფულენდას, მუჭო ოღურჟოლუ გიმნაზიარი დო მინ კისერს უჯუნუნს, მინ ღვანწკეფს დო ლეჩქვეფჷშა მიწმიკინანს. ძღაბი დუჸით ითხინუანს, ბოშ ხოლო გამაღეთ, კოფეს დოხუნელ ბოშკოჩიშ მარჩქილარო, ხონარეკინელო ეჩიებუ:
-ქომუჩით სგერჭული. მუთ ოკო მუნტუე პაპიროზის?
-ხალათ, ხალათ!-ჸელენანს ძღაბი დო კინ გუსვანს სგერჭულს, უკულ კინ გოვალუნს, ხოლო უმოსო აჸვერენს თოლს ტიბუ წკვერემი. თე წკვერემს თეშ ჩქუ, ითამ ჯაგვი უკახლე-უკახლე მეურს. ლიას, ძღაბი თმენს დო დიდხანს ჯუნუნს ლეჩქვეფს, მარა უნელო ჯაგვი მუდგასიენ ქატაქუ დო ჟირხოლოს წიმ გეგნაჸოთანს-ბოშკოჩი მერქას აჩემენს ცხენეფს.
-გერეფი!-გემწიძახუ თინა.
მიკჷ, მარძგვანჷშე, ალ-დაჩხერიშ ენარზა მოჩქუ. ჯაგვი თი ტყაშჷპიჯჷს გერე, მუჭო ვალუაშ შვანს რჩქინდუდუ . ენარზაშე ტყა გინოუჩარებე დო ფარფალუას გეუჭოფუ, თეშ მუჭო უფარფალუანა თიშ წოხლე გინოფაჩილი ნთელ ოღეკეშის ცაშა ეჭუმინაფილ უჩა-მოჭითარე დაჩხერიშ ნინეფი, ნამუეფ, უმკნუჯინუე მიკეიანიშ, ნოქურიშ ქიონია ოროეფწკილა ართო იბარბანჩუნა ჯაგვიშე ართ ვერსიშ იქილე, გვალო უმოს ფურეთ დო გეჟამარით ღვიღვონდუნა, ჟი დო ხასლაშე იკინანა დო ვიშო-ვიშო ფორუნა ატას,-ოკონდა მუნეფიშ პარანა მოთგანჭუ ღვაშა ხოლო, ხელეფჷშა ხოლო, გინოჩვარჩვალერი უჩა დიხა ნამდგაინ ჭვილი ორთვალიშ ჭითა კაბრასიე დინოხუნაფილ, ტყაშ კიდალაშ ჯინჯჷს ხოლო გერე სუმი მოჭითე სისვი გერი, ნამუეფს თოლეფს მინ მანჭიე რცხჷნი სინთე უველუნა, მინ ჭითა,-ხუნწიშ მურაბაშ ჩხე სიროფცალო კაკაბი დო კარაკანი. ცხენეფჷქ ართ მიოხვიხვინუეს, ხასლაშე გოლეს დო მიდეთირხონეს კვარჩხანჷშე, ხონილეფჷშე. ბოშკოჩჷქ მოსადიოამო გეგნანთხუ უკახლეშე, ჯაგვიქ ხოლო აშარაბადით გეგნოლუ ნოხამჷდიხაშა...
სოდგაინ გერსამიშ პიჯჷს ცხენეფჷქ ართშახ ხოლო გიქანჩეს, მარა ძღაბიქ გემწოსხაპუ დო მოსადიო გეკწოსოფუ გახანგებულ ბოშკოჩჷს. ათე შვანს ძღაბიქ კოფეს ქემკახორცქუ დო მუდგაინ კინას გაჭკირუ ღვანწკიქ. ათაშ ქოდასქიდუ სადღამუშიოთ ჭიჭე ნაკვათაქ ლეჩქვიშ ძგას, დო მუჟამს ოკითხუდეს, თენა მუ გიღუნია, თინა ჰამოთ გიძიცანდუ კალკალეშა.
-ჰო, ენა ულირ დღალეფიშ ანბე რე!-იჩიებუდუ თინა დო გეთმიშინანდუ თი დიდხანიშ კინოხიან ბზარხულს, მარაშინა თუთაშ სქირჷ დღალეფს დო უკმელა სერეფს, კელუას, ახალ შურამ გიმაშ რზვენეფს დო პიჯუხოკუ გიმნაზიარ ბოშკოჩჷს, ნამუწკილა ართო ჯანუდუ გვალას ონჯუა-ონჯუას დო უცქვირინანდუ მოჭყვადილ მურიცხეფიშ მერქა გოვალუას.
-გერეფჷქ დომოშქურინუეს, ცხენეფჷქ ქომიხვამილუეს,-იჩიებუდუ თინა,-მა ხოლო დირღონა ვორდი დო შიშთი, გეგნოვსხაპი დო გუვაჩემი...
თინეფ ხოლო, მით თის ბრელშახ ქოჸოროფებუ მუშ რინასჷნ, იჩიებუდეს, ნამდა მუთუნ ვაუჯგუდუ სისქვამათ თე ნაკვათას, ნამუ სვისვალ იროიან ძიცას მეგუდუ.
07.10.1949
დააფიქსირეთ თქვენი აზრი