ოღეკეშის
"იუკმელებუ, სერით ალბეთ თირბორია გეშალუ...
ჭუმან ქირსე რე, დემი ოხარხაშაია დღახუ, დო ათეშ გურშენ ხოლო უმოსო ჯაბურ ჩქუ საუბადო მაინჯე, წუხუა ბორჯი, ჸუნგა უგუთებუ რზა დო ჟილინ ბორიაშ ბუჟღის დინოდინაფილ ოღეკეში. ცა ჭიეიჭეთ უმოსო გიმე იკინანს; მიკოვალუნს შქირატილ დღაშ მოლებიშფერო-ჭახუშფერი სინთე, დო ნირსამ მიკეიშონს თაშ-თაშ რჩქინდუ ძიუთ იძირებე ეფერ მარმალი, ნამუთ მერზეშ ჯვირინა თოლეფს დღას ვეგთახირუ გაისაკარაშ ზოთონჯამ სერეფს...
თე უბადობაშ მაშანულებერი მალანური მარმალიშ მოლახ, გვერდ ვერსის მუთუნ ვაჩქუ. ხოლო ჯგირი, ჸინიე დო ბორია ლექინო გინმოქოსუნს რზაშე სქირჷ თირჷს. სამანგათ, თე თირს თინა ღვა-პიჯჷს გუთმარღვანს მერზეს, სირთინით მიკმარღვანს თირგვერგვილს მაშარი ჭყონიშ ბარჯგეფს, გრინჯუნს დო ჟილინ ბორიაშ ბუჟღის მიკოდინაფილ გიჩქუ დუდი...
ოღეკეში, რზეფიშ მიშაკინელს, დემ ნოღეფიშ დო კინაჷშარეფიშ მოიქილე, რე ართ ხუტორი. ჭიჭე ოფუტე ხოლო, ნამუ მუდგაინ შვანს ხუტორიშ ხასჷლას რდუ, ასე ხუთიზმა ვერსიშ ვიქილე რე. თე ხუტორს პატჷნ ბასკაკოვეფჷქ ლუჩეზაროვკა ქეგიოდვეს, ჭიჭე ოფუტეს ხოლო ლუჩეზაროვკაშ ოზეეფი.
ლუჩეზაროვკა! ზუღაშნეთო ითხირიშუ თიშ მიკ-მიკ ბორია, დო ოზეს მაღალ ჩე თირგვერგვილეფს ონთხორუეშ ძურგაცალო მოთმონირსუნს კალკალეშა ჟილინ ბორია. თე თირგვერგვილეფი ახუნთილიე ართიანჷშე ბელქანო ნაფარჩხა ოგაფლეფით: პატჷნიშარეფიშ ჸუდეთ, „ოკარეტე“ ფარონიათ დო „ომუარხე“ ხულათ. არძა ოგაფლა ჯვეშ ყალდაშიე-ქვიზალი დო ლიღალი. ჸუდე ყამბარგერთვილიე; თიშ წოხლეიან ჸურე ხვალე სუმ ჭიჭე შუკუმით გინმაჯინე ოზეს; აბარწეფ გინორთვილიე; ჭაშ დემ ორთვალი ბორჯიშ აშაბანს ქენოუჩარებე. ათეცალ ორთვალი ომუარხეს ხოლო უღუდუ, მარა თიშე ხვალე ჩხირჩხაქ მიკოსქიდუ, ნამუსით ლაგირძია კისერცალო გედგუ ანგურაშ ინწირა ოკუმოლე...
ოზე-ხიბა ითამდო იშაღურელე: ადამიერიშ დონარინაშ მუთუნერ ღანკი, ფარონიშ ხასჷლას დონწკარილ გიმაშ მოლახ, მუთუნერ ნაველს ვაჩვაგუთ ოზეს, ზიტყვას ხოლო ვეგეგენთ! ირფელ თირს დუფორუ, ირფელს ღურელიშნთო ლურს გაისაკარაშ ბორიაშ ალაზირზინს, ზოთონჯიშიერ ოღეკეშეფჷშქას. გერეფ გილეწარწალუნა სერსერით ჸუდეშ გოხოლუას, დოლოეფჷშე მულა, ბაღის მიკილენა დო მეთინუათ აბარწას ქომადირთუნა.
მუთუნშვანს...მორო, მის ვაუჩქუ, მუთ რდუ „მუთუნშვანს“! ასე ლუჩეზაროვკას გვალო ეჩდობრუო დესეტინა ოხონალი დო ოთხი დესეტინა ალაგიში დიხა იკოროცხუ. ნოღაშა გეგნიხორუ იაკოვ პეტროვიჩ ბასკაკოვიშ ფანიაქ: გლაფირა ივანოვნა დიხაშ მაზიმალს ეკუხე ოსურო, დო სოფია პავლოვნა ხოლო დახე ნთელ წანაშ აშაბანს რე თიწკილა. მარა იაკოვ პეტროვიჩი გაისაკარაშ ჯვეშ მახოროე. მუშ რინას მუზმარენ ოზე-ხიბა გაფიარუ ნოღას, მარა „რინაშ ეკონია ნასუმორს“-ათაშ უჯოხოდუ თის ადამიერიშ სირჩინუეშა,-თექ გალებერო ვათმასქიდუდუ. თიწკილა მილარე მუშ ნაჭკორუ, ბრელიშ მორაგადე დო ჯან-ღვენიერი დედიბი დარია; თიქ მურდუ იაკოვ პეტროვიჩის არძა ბაღანა დო სადღამუშიოთ ქოდოსქიდუ ბასკაკოვეფიშ ჸუდეს. თიშ მოლახ, იაკოვ პეტროვიჩის ჸუნს ხოლო ართი ქირანჯი, ნამუს გაგესქუა ოსურიშ მანგიორობა მეჸუნს: გაგესქუა ოსურეფ ჟირ-სუმ მარაშე უმოსის ვათმარძუნა ლუჩეზაროვკას.
-ინა ხოლო დოდირთუ იაკოვ პეტროვიჩიწკილა!-იჩიებუნა თინეფ.-მერაყით დეჭიფარებუ გური!
ათეშ გურჷშენიე დუდჷშა გეთმიდვანს გაგესქუა ოსურიშ მანგიორობას სუდაკი, ოზეეფიშ მახორო ყაზაყი. ზირტიკი დო უთური კოჩიე, მარა თაქიანობას ქემიარჩქვანუ დო. გუბორჷშე წყარ მუღუ, ოტიბაშეს ეთმიორძანს, „მილაჭკომაფუს“ ხაშუნს, ჩე ლაფშას ჭას უწკაპულანს დო ონჯუა-ონჯუას პატჷნწკილა ართო ჯვემაშ თუთუმს უფურკუანს-იშეიშენთ დიდი სოფაფი ვეგიორე დუდჷს.
დიხას იაკოვ პეტროვიჩი გვალო ართო ყაზაყეფს არძენს არენდათ, თიშ ოფანიე ანანური ძალამ უკაჭულიე. კინოხ, მუჟამს ოზე-ხიბას ბაღუეფ, თიფუეფ დო ოჩაჩუე-ოჩხვარალ გეურდუ, თიშ ჸუდე-ხიბას ხოლო მუთა უჭირდუ. მარა მუ გესახვილაფჷ რე ბაღუეფ, ოჩაჩუე-ოჩხვარალ დო თიფუეფ, მუჟამს გვალო ეჩდობრუო დესეტინა დიხა უღუ დო ინა ხოლო ბანკის აფუ სამანგოთ მიკოწონებული? უმოსო ნეცეწკილა ხოლოს ივაფუდუ, გეგმუჩამუდუკო დო თი ფარათ ართხანობას იშენთ საიაშე უმოს გილმაქაქალეთ დურინუდუკო. ოდო, იაკობ პეტროვიჩიქ ხოლო დიო ოჩაჩუე-ოჩხვარალ გეგმოჩუ, უკულ ბაღუეფი დო მუჟამს თიფუეფიშ ნთელ ორთვალი დიშქათ გეგმირინუ, თიშ ქუაკირიშ კიდალეფ ხოლო ქემიაჸიდუ. ეკოცუ ყურდგუაქ ლუჩეზაროვკას! დუდო იაკოვ პეტროვიჩიშოთ ხოლო საზარო ივაფუდუ თე ნავარო გინორთელ ოგვადოს რინა, მუდა შქირენიშ დო ჩხურუშ გურჷშენ დარია გერჩქვანილ რდუ გინორთელ ზოთონჯიშ ირ დღახუეფს ოფუტეს მუშ დასქუაშა, კუჩხმადვალიშ მაჭალჷშა ულას, მარა ზოთონჯო იაკოვ პეტროვიჩის შხვა, უმოს ართგურიშ გუშა ოხვარუდუ..."
/ეშნარიდებუ ივან ბუნინიშ "ოღეკეშის"-შე ("ობაღანე თხობელუეფი")-ამონარიდი ივან ბუნინის "მინდორში"-დან ("საბავშვო მოთხრობები")/
დააფიქსირეთ თქვენი აზრი