მიკეიანი
"მუთუნ შვანს, ვით წანაშ წიმახ, ჩქიმწკილა ართო არბატის ოსუმარე „ორუმეშიშ პოლუსი“-ს მილარდუ ართი დვირა, ახირაფილი, ქიანას არძაშე დუდგიმაკინელი ივან ივანიჩი, ასე რჩინუ დო გვარიანო მოძოკილი კოჩი.
წანაშე წანაშახ მილარდუ დო მუშ ვერეხ საქვარს ორთუდუ მოსკოვს. მუდგასიენ აკეთენდუ, მუდგაშიენჷშენ რდუ ქიანას თე კოჩ ხოლო. ათაშ, ჩხორო ბჟამშოთ მიშუ, ხუთ რდუ დოჭყაფილ თეშ, ირთუდუ. მუდგაინ დვირა, მარა უჯაბური ზმონეფს ართუაფილი, ოცეცკარეს მუშ კილას გეგლეღანდუ, მაჟია აკაურთაშა ეშელენდუ დო ბირგულამ აბარწას ქაჸუნუდუ. აბარწა ადღზოლებული რდუ დო სამელამოსოთ გატაკუდეს ჩხვინდჷს თიშ სანწალე, ახუნთილი შური, ნამუთ გოჯოგელ ოსუმარეეფს წიმინდანა მერჩელს. აბარწა რუმე დო უბადო რდუ (სენეფიშ შუკუმეფი ოზეს გინმაჯინედუ, ხიბეფიშ ჟინ შუკუმეფს ხოლო ცატუ სინთე მონმიშუ), დო თიშ ირ ბირგულიშ ლიას ნთელ დღას ერძამილ რდუ რეფლექტორამ ლამპა. მარა გიოხედუ, ნამდა ივან ივანიჩი ონდეთ ხოლო ვეჭუანდ თი მონკა გინჷს, აბარწაშ გურჷშენ მუსით გინაფულენდეს „ორუმეშიშ პოლუსჷშა“ უგურჩქვანუ ადამიერეფი. თინა დვინდვალურო დო ხაჩათ მეჸუნდუ აბარწას. ათმახვადუდეს ალმახოროეფი: შაშმათო მალუ, ახალფრიმულგოტებული დო თოლრცხიმინა სტუდენტი, ნამუ შარა-შარას მიკმიქუნანდუ შინელს; დუდიშუული ებრიშ სტენოფრაფისტი ოსური, ანაგმაღალი, მესაჯინე, მორო ჩე უჩახიტამს მეგუდუ; ანაგკვეკვერია რჩინუ ოსურპატჷნი, მოკვანწილ-მოდაცილი, ფერუმარულსუმალირი, დინცხფერთუმამი, ირო მაღალქურამ კუჩხმადვალ მაძუდუ დო ირო ნახვალა მოძუდუ ყორყელს; თე ოსურპატჷნწკილა ახვამილაფას ოწმახო გოთმაგებაფუანდუ თი ორჟონეფიშ რანწკაფი, ნამუთ გებუდუ თიშ ჯგვიბა ჯოღორს, თუდონ ღვანჭი წიმ აფუდუ წიმოკინელ დო ჭყორინჯა თოლეფ გოჩვიგინაფილო გემნობრიცინაფუ...ივან ივანიჩი რდუალურო მეთმესალმებუდუ არძა აწმახვალამეს დო შუროთ ვაუღუდუ პრეტენზია თიშ გურჷშენ, ნამდა გამუო დუდჷს ონდეთ დოთმუშქვანდეს. გილენდუ ართ ბირგულს, მიკურთანდუ მაჟიაშა, უმოს გინძეს დო რუმეს, სოდე უმოს მიკჷ ჭითათ ვალუნდუ კიდალაშ ლამპა, ქემთურღვანდუ კილას მუშ ხიბას-დო თე ხიბაშ ვიშო ხვალე დოთმოსქიდუდუ მაჟია ორდოშახ.
მუს ორთუდ თექ, მუჭო ილიენდუ შული შვანს? ღორონთჷს უჩქუ. თიშ დინახალენ რინა, ნამუთ მუთუნერ გალეიან მეჯინათ ვეგშმარჩქინდუდუ, ვართ მითინს ოკოდუ დო ვართ მითინჷშოთ ხოლო ვარდუ საჩინო-მუარიხე ოსურჷშოთ დო მაკორიდორეშოთ ხოლო, ნამუეფით თიშ ხვალახობას ხვალე თით აკმორციენდეს, ნამდა სამოვარს მეუზოჯინუანდეს დო დოთმუნწყუნდეს ნორჩალს დო გოჯოგელ პიჯიშ ობონალს, სოურეშეთ წყარი ულებუო გოთმაბუნდუ, ინა ხოლო ღვას დო ხელეფს ვარჷნ, ძალამ მაღალო დო ხასლაშე, ორცას. კინ მაჟიაშახ ვთქუანქ, საიასაღო ახირაფილით, საისაღო ართფერუანობათ რდუ ივან ივანიჩი. მიკმიშუ ზოთონჯი, დოთმოდირთუდუ აფუნი. რაბადით დო ღურწკოლით მეჭვირთუნდეს არბატის კონკეფი, უმუჭყვადუო ინჭუაფუდეს სოდგაინ, ართიანიშ ახვამილაფარო, ადამიერეფი, მიჭკირჭკინუდეს უგნურთუ ფაიტონეფი, ჸელენანდეს სარღაგედგუმილ მეროჭიკეეფი, ონჯუა ბორჯის მიკჷ, ოშაჸეშ დალიას ორქოშფერო რწკინუნდუ დინმალუ ბჟათ მოსარკილ ცა, არძა ბობოთის დო სიმსის მუსიკაშნეთო გეთმიოწენდუ დუდჷს კარეცალ ცარიატაშ რჭელამ ჯვეში ორეკეშე მორაჸილი სჷრაკუნიშ გურგინი. ივან ივანიჩი ხოლო ითამ ვართ ორწყედუ ირფელ თეს დო ვართ არჩქილედუ. ვართ ზოთონჯი, ვართ აფუნი, ვართ ბზარხული, ვართ დამორჩილი ონდეთ გაბლას ხოლო ვართუდუ თიშა დო თიშ რინაშა. მარა ამარ, ართჷშახ, აფუნს, სოდგაინშე დიკილუ დო "ორუმეშ პოლუსის“ ქემლადირთუ დო ივან ივანიჩიშ უხოლაშ მონდაბეთ გინირთუ მიდგაინ თავადიქ დო ივან ივანიჩის რსულო ულებუ, უგშუჩინებუ მუდგაქჷნ ქაღოლუ..."
/ეშნარიდებუ ივან ბუნინიშ "მიკეიანი"-შე ("ობაღანე თხობელუეფი")-ამონარიდი ივან ბუნინის "შორეული"-დან ("საბავშვო მოთხრობები")/
დააფიქსირეთ თქვენი აზრი