ეკონია დღა
" ირფელჷქ გეთუ: გუმოჩამილ ორინჯი მიდარაჸეს, ფაიტონეფს, მოსართეს დო დგიმს რზა ქუწურუეს, მარაკეფიშ, ნანია-ფარონიეფიშ, ბაღუეფიშ დო ოცხენეეფიშ ხიბეფი დალიაშახ გომკანჯეს: ირდიხას ფირუტა-ხულობა დო შვება ზოჯუნდუ, ოზე ხო გვალო ჩოლერ რდუ.
ახალ მინჯექ, მადაბურ რასტოვცევჷქ, მაჩინუ, ეჩ პირელს, ონჯუას ქომურქია. თიმ დღას, სუმ ბჟამს ულა უღუდუ გინოჭყვიდილი ვოეიკოვს ხოლო; ფანია დიო ხოლო ვითოჟირს გოუტუ ნოღაშა.
ქირანჯეფჷშე ჟირჷქ დოსქიდეს: პეტრე სალდათიქ დო საშკაქ. თინეფ ჩოლერ საგესქუოს გინძე ორძოს რდეს წუმოციმილეფჷ, თუთუმს უფურკუანდეს დო მინ ძიცათ, მინ ნარღით რაგადანდეს გითორციებულ პატჷნჷშენ. ბურნუშფერ კოსტუმს დო ბაიაშფერჷნარჩამ ულანური ჩიხაგიორთუმუს ნოღურო გიმოკვანწილ პატჷნს ართ ხეს მაჭუკი უკუნებუდუ, მაჟიას ტაბურეტი დო ათაშ გილეშუ ჸუდეს. მუ სინთე მილარდუ თე ჸუდეშ გოხიტონილ კიდალეფს! თინა სენაშე სენაშა გინალ ხიბას ონჯანდუ, ტაბურეტის გეთმედირთუდუ დო ჭანჯეფიშ გენახუნა მინდიხას ელაფირ შპალერს უთხინუანდუ კიდალეფს: ტყვაცაფით დო ფაჩალით დოდმოცენდუ მერჩელს დინახალეშე კირით დო გოსქირაფილ ჭაბუთ ფორილი შპალერიშ ლურწემ ნოჭკერეფჷ. მუხურიშ კაბეტ სენას ორქოთ მოხანტილი ლები შპალერი რდუ მიკოჭაბილი. თინა გარჩიელებედუ დო ფერმოთირელ რდუ, მარა ჟი იშენთ ქასქილადუ ბებესირი ქუფური ქართეფი, კვადრატეფი: თე სენას ირო მიკობუდუ დაგეროტიპეფი დო ჭიჭე-ჭიჭე ჯვეშებური გრავიურეფჷ, მუხურს ხოლო სვანჯუდუ ხანტეფი. თიშ რჩუალაქ ვემიხუჯინუ. ბჟაშ სინთე ონდეთ კინმაჸათანდუ ოთხ კაბეტ შუკუმიშ თხითხუ დო ქანთი, ნაჸილი კაპიჭეფს. ვოეიკოვს ქოგაშინუ თაქ გოლებურ ბაღანობაქ დო დიო ართ შუკუმს ქოხაკუ მაჭუკი, უკულ მაჟიას...შუშეფჷქ ღვარწკალ-ღვარწკალით ქეგიოცუ ჸორადილ რაფეფს, დოჩხარილი პარკეტიშ ბაიაშფერი ბრუოკუნთხულეფს. ბაზო-კარაბეფჷშე დურქუ მასქურჷქ, ქორჩქინდუ იასუმიშ ტუტაშფერ თამლეფჷქ.
ვოეიკოვჷქ ტაბურეტის ქეგლადოხოდუ დო დეზმონუ. ასე ართ მუთუნ დოსქილადუდუ გინაჭყვიდალი.
ბრელ ხანს ხედუ, გიორთუმგინონწყუმილი დო დუდღუზილი. თუმა ჯვეშებურ ყალდაშა უღუდუ ორცათ გინორცხონილი-მორძგვიშე კვარჩხიშა დო კიროკილო გეძუდუ ჸვინგის. კინ ქოგაშინუ ბაბუეფჷქ, პაპუეფჷქ, ნამუეფით თე ჸუდეს რდესჷნ, ათე მუმალონს ღურეს; ქოგაშინუ დახე არძა წიარჷქ, ნამუეფჷქ ჯოხობუ გუსიმუეს ვოეიკოვიშ ჯინუობას...ასე თინეფიშ გომნარყჷშე ამშვიქ დოსქიდეს-შქირენჷშე დო სირჩინუეშე გათებულეფჷქ დო დო კილამეფჷქ...თინეფს ხოლო მალას გეშალუნა შური...ქო, მარა გრიშკა როსტოვცევს ხო ვადუტენს! ვოეიკოვჷქ მონკა დუდჷს ეუკინუ. ღაფილი მორცხჷნი უჩა ოშმეშეფით ფორილ ღვა ნაჟღამაშე დორღამუდუ დო დოხუნჭუდუ. თოლეფ მეშხანო უველუნდუ.
გიორთუმ ქეგირთუ, მაჭუკიშ ხაკაფით გიმილუ აბარწაშა, ბირკულჷს გეგნოდირთუ დო საგესქუოშა გეგნაძახუ. არდგმულჷშე წოწორია პეტრექ გეგმოლუ.
-ჯოღორეფ სო რენა?-კითხუ ვოევიკოვჷქ.
პეტრექ გეგნაჯინუ კარაპას, ოზეს, ბაღის...
-ითამ არძა თაქ გოხოლუნა, ჩქიმ პატჷნ.
-ოდო, გვალო ჯგირი,-ხონარმაღალო დო კეოტურო გეგნაძახუ ვოეიკოვჷქ.-არძა დაშქვიდე. წიაკალო ხუთ შაურს ქემერჩანქ.
უკულ წოლირ აიაშდარ მუშტუკის შხუ კუნტა პაპიროზ ქემთოდუ დო აბარწაშ ბახეს ქეგლადოხოდუ. პეტრექ საგესქუოს ქემკიფულუ. საშკას მერქას ქაახარუ პატჷნიშ გინნაჭყვიდა, ორძოშ თუდო სჷრთუ დოგორუ დო კინ გიმილუ არდგმულჷშა დო ზმონენდუ, ნამუთ დიბჭყავა.
სუმი ჭარგა ჯოღორი შქა ოზეს ჯანუდუ დო ბჟას იტიბუანდეს. ჟირ ჩეს ნანიაწკილა ქოდუნჯირუნა ოროს. ართი ნუზონაშე მირულედუ, დიო ხოლო ფურცელუგუფაჩუ, პეულერ უშქურეფიშ ოჯალეს, აფუნიშ მოვარდისფერა დიხას. არძა რჩინუეფ რდეს. რჩინუდუ თე ბაიაშფერ ჸუჯუჩა ძურა ჯოღორ ხოლო, ნამუს ჭიფე ჯერღვამ კუჩხეფი გინძე ქეჩეჩი ბოძორით დოფორუდუ. პეტრექ დურშვინუ დო ბირგულჷშა ხე ქეგიშქვუ. ჯოღორჷქ ოზე გეგნოჭკირუ დო ბონო თიშა მოლერულუ, კუდელს ათჷულუ, დუქვათალუ დო ხე გუსირქუ. პეტრექ კისერს სჷრთ ქომუსკუ დო ხაკაფ-ხაკაფიათ გოქურცუ ბაღჷშე. ქვარქვაშა კუჩხიკულე საშკაქ კარაპაშ მუხურს მიკოჸოთამილ ფიარს ქოქანჩუ ხე დო რულაიათ ქათხოზუ.
ჯოღორ დიო ფირტვალო მეთხოზუდუ. მარა ბაღიშ ლაბახაწკილა გეკეოტუ, გესხაპუ, გეიწკუმინუ დო მინ-მინ გინულა დიჭყუ. საშკა ვაგაჩემებე, თეშ ქაქანჩუ უშქურიშ მორცხჷნჷ ორქოშფერ ჟირბოჯგა ჩხოლარს დო მუზმარენშახ ქეგნუჸუნუ გოხიკინაფილ ოჭიშის; ჯვეშ ბოძორიშ ბუძგურჷქ ქემკასქიდუ ჟირბოჯგას. პეტრე ხუჯჷშა სჷრთგინოჸოთამილ მირულედუ, დახე ამარ-ამარ ეკირთუნია. ჯოღორ ვიშო-აშო მიკმახორცქუდუ. უკახალე-უკახალე იკინანდუ დო სჷრთუშე დუდიშ რსხებას ლამენდუ. ლურენჯ წიარეფს კაკურცხინეს არძაქ ართო ქემეცუეს ძურაშა..."
/ეშნარიდებუ ივან ბუნინიშ "ეკონია დღა"-შე ("ობაღანე თხობელუეფი")-ამონარიდი ივან ბუნინის "უკანასკნელი დღე"-დან ("საბავშვო მოთხრობები")/
დააფიქსირეთ თქვენი აზრი