მუაჩქიმ ჸვარანს გუდუ. თე ზმონჷქ თიმწკილა მომირთუ დუდჷშა, მუჟამს ჭიჭე ბოშ ვორდი: ართჷშახ „ნივას“ ქობძირ ამნახანტუ-ნამდგაინ კირდეს გერე ნაპოლეონი ჩე გვიზათ, დომბაშ ტყებიშ ძიქვათ დო კუნტაჸალამ უჩა მაგუეფით; უნელო ბოგდანოვიშ „პოლარულ გილულეფიშ“ ამნახანტუეფჷქ ქოგმაშინუ დო ხიოლჷშე გომაძიცინუ,-თეშ ქემუგურე ნაპოლეონი პინგვინს,-უკულ ხოლო ჯაბურო გივზმონი: „მუაჩქიმ ხოლო ჸვარანს გუ...“მამას ძალამ მეჩქუდ ეფერ ხენჭაფუობა უკუნებუდუ ჩქინ ოგუბერნიე ნოღას, დო თექ ხოლო უმოსო წაჸონუ თინა; მამჩქუდა, დიდჩინამ საოშოს ხოლო, ნამუსით თინა ოკათუდუ, ვეგორედუ თიშე უმოს მონკა, ურუმია, ჯუმიკა, მუჭო ზიტყვას, თეშ საქვარს ხოლო კუჩხსერგელა, ლანთირია გურქუა კოჩი. ქვეზა და ქვაჯალა, წელს ონდეთ მოღვანკილი, ჩუმუხია უჩათუმამ, უჩარდია, ღვაგუმაზვედელერი, პიჯხოკილი, ჩხვინდსვირთა, თაშ ვთქუათჷნ, თახმა ჸვარან რდუ-სამელამოსოთ თიმწკილა, მუჟამს, ჩქინ გუბერნატორიშ ალმასქუშ ქიმერმაჭყოლოფუე ონჯუეფს უჩა ფრაკის მოდაცილი, წელს მოღვანკილი კუჩხუმუთირუო გერდუ რუსიშულ ხულაშ მოგე ნამდგაინ ჯიხურწკილა, ჸვარანიშნეთ დემ დუდჷს ურქენდუ დო ჸვარანიშნეთ ჟერჟელა თოლეფით ორცათ უჯინედუ მასხაპალეფს ხოლო, ჯიხურწკილა მომალუეფს დო თი ბოიარინას ხოლო, ბრილიანტეფით მოკვანწილ ფაღა ხეთ მეთმიოჭირინუანდუ კათას ეფი ბაიაშფერ შამპანურით გოფშა ფრიასენეფს დო ინა ხოლო, ხიბულო იძიცანდუნჷ. თენა გოხოლუდეს ფორჩათ გოქუნელი, დუდთანჯამ დო ღვანდ-ჯავარამ ბეთქერე ოსურპატჷნი, ნამუსით პუდრსუმალირ ჩხვინდი თეშ გინორთედჷ ვარდიშფერო, გაჩქვენუდეს ხელობამ რენია..მამა გვარიან ხანიშ რქვილი რდუ. სქუალეფ ხვალე ჟირ ვპუნდით,-მა დო ჩქიმ ჭიჭე დადა ლილია,-დო ჩქინ გიმოჩოლერ ოხიორაია რთვილს, ხვამაგეფილიშ დო თარ ოშაჸეშ შქას მენჯილი ჩეჯალეფამ ბულვარჷშა გიშმაულარ ხეშუულ ჸუდეშ ქორი უკინებუდუ დო ჸინჩას იჯინედუ მუშ ვერეხ, ორკჷშნეთო გოვარკალერ სენეფით. ობედინერეთ, მა გვერდ წანაშე უმოს ხანს ვორდ მოსკოვს, ვგურაფულენდი კატკოვიშ ლიცეუმს დო ხვალე ქირსეშოთ ვარდა ბზარხულიშ გესვანჯაფეფს ქომივში ჸუდეშა. მარა თი წანას გვალო ულებუ მუდგაქიენ ქოდობხვადუ ჸუდეს.თი წანაშ აფუნს ლიცეუმი გუვათე დო, მოსკოვჷშე მუჭო ქომობრთი, ბონას გოვჩიჩონდი: ითამდო ბჟაშ მინობარჩხალცალო უნელო ათეჷშახ ღურელ ჩქინ რთვილს,-თინა გოსინთორუ თი აღნერდუა, ფენდერა ცირასქუაშ მონულაქ, ნამუსით თინა რდუ დუთირუ ბრუო წანერ ლილიაშ ძიძე, წვერთელე დედიბი, ნამუ შქა უკუნუუეფიშ ნამდგაინ წკნელიშ ჯაშე გიშნათოლა ნაწახნაკუს მოგენდუ ეფერჷ. ჭყოლი ძღაბი, ბაბაჩქიმიშ ართ-ართ გიმეიან ხენჭაფუობაშ ხეშ თუდონიშ ცირასქუა, თი დღალეფს უხურგეთ მარდიელ რდუ თიშენ, ნამდა გიმნაზიაშ გათებაშ უკულ ათაშ ჯგირო მინწყუ, თით ხოლო, ნამდა მუშმახანაქ, თაბუნჷქ ქომურთუ. მარა გიჩქუდანი, მუ დოშქურინაფილ რდუ დო მუჭო იფოცებუდუ მუაჩქიმიშ წოხლე ჩქინ თინჩჷურ ონდღურეფიშ შვანს, მუჟამს ირ წუმს რაკვალით უჯინედუ უჩათოლეფამ, მუცალო ჯუმიკა ლილიას, ნამუ ხვალე ირ ხვარხვალს დო ქანცაფის ვარი, დვირინიშ შვანს ხოლო კჷგა რდუ, ითამ ირო მუდგაშიენ მეჭირინაფას უჯინედუკო თეშ დო ჯღირკინით უქანცალუანდუ უჩათუმამ დუდჷს! ონდღურს მუაჩქიმს ვაბჩინებულენდი: გოზვიზვინაფილო ვენკაჯინედუ რჩინუ გურის, ნამუ ნაშუა ხეშჯაჯეფით მოთმუზოჯინუანდუ თიეფს. მინშახ მუს თქუანდუ, მინშახ მუს; რაგადანდუ წა-წამს,-იბაჯალუდუ, მარა იშენთ რაგადანდუ,-მუ რაგად ოკო, ხვალე თის ურაგადუდუ, ინა ხოლო ცერემონიულო უწოლენდუ ჯოხობუთ დო მუმაშ ჯოხობუთ,-„აიაშდარი ელენა ნიკოლაევნა“,-ციგანუას ხოლო ლამენდუ. თინა ხოლო თეშ გალუდუ მინშახ, ნამდა ხვალე ცოდაჯგუა გოძიცინით უგამუდუ, ინა ხოლო ექე-აქო დაწყორუდუ სვასვა ღვა-ღვა ჭიკუ კაჟინათუმამ ცირასქუაში. თის მიკაქუნდუ ჩხე, აღნერდუალურ ცჷმჷშე რღიეფდორუმებული ფამფა ჩე კოფთა, სოდე ონდეთ გიოხედუ ჭიჭე წჷეფი. ონდღურს თოლ ვაგათინედუ ჩქიმდა: თე შვანს მუაჩქიმჷშე უმოსო ჩქიმდა ოშქურუდუ. მარა მუთ უმოსო ათმამრიდუანდუ თოლსჷნ, თისხით უმოსო მიზვიზვინანდუ მუაჩქიმი. ხვალე თენა ვარჷნ, მა ხოლო მეთმევხვადუდი: ათე დუმატანჯებელ ჯინას, ნამდა მუაჩქიმჷშა მურჩქილუაფუდუკო დო ტაჯალა, მასოფინე, მორო ჯუმიკა ლილიაშა მიკუჯინუდუკო, იფულუდუ გვალო შხვა შქურინი,-ჩქინ ართო რინათ ნაზა ომიშური ბედინერობაშ ხიოლხოლაფირი შქურინი. ონჯუა-ონჯუას, მუშობას, მამა მუშ კაბინეტის შუნდუ ჩაის დო თაიშახ ორქოთ მოველირი დემ ფინჯალით მუზოჯინუანდეს შუფელჷშა; ასე ხოლო ჩქინწკილა ართო შუნდუ, ოონდღურეს, დო სამოვარწკილა თი ცირასქუა ხედუ-ლილიას ხოლო თე შვანს ლურდუ. მამა ჭითასარჩულამ ლიღალ დო ტკიბალი ქუქუნაკით გიმილენდუ კაბინეტჷშე, მუშ ორძოულს ქენოდოხოდუდუ დო ფინჯალს ქუჭირინუანდუ. თინა ხოლო პიჯჷშახ გუფშანდუ, მუჭო მამას უჸორდუ, გორაკვალერ ხეთ გინოჩანდუ, მა ხოლო ქეგემიბუნდუ, მუშოთ ხოლო ქეგიბუნდუ, უკულ ფიჭვეფს დუკინანდუ დო მუდგაინ ხესაქვარს მოთხუნდუ ხეს, მუაჩქიმ ხოლო ნარას, ზიმოზით იჩიებუდუ მუდგაინ ურცხის:
-კაჟიათუმამეფს, აიაშდარ ელენა ნიკოლაევნა, უჩა ვარდა დინცხფერიშ ასქვანა...თქვან ღვას უმოსო დაასქვანს უჩა ატლასიშ ქვენჯი მაღალ დოკიბირელ ოჸალეშით, ა ლა მარია სტიუარტ, ჭიფანა ხავერდიშ ქვენჯი ჭიჭე დეკოლტეთ დო ლალიშ ჭიჭე ქიაჩით...ვართ ლიონიშ გესერელ ლები ხავერდიშ ქუნჩი დო ვენეციშური ბერეტი ივაფუ უსარიგო...თენა ირფელი, მუ რაგად ოკო, ზმორინიე,-ძიცათ იჩიებუდუ თინა...-მუათქვანი თუთაშე გვალო სუმონეჩდოვითოხუთ მანათის ეთმეჭოფუნს ჩქინწკილა, სქუალეფ, თქვან გალე, ხოლო ხუთ უჸუნს, ართმაჟიაშე ჭიჭელეფი, თაშ ნამდა, ნთელ რინას უმუთელობას გილენთ ალბეთ. მარა, კოჩჷქ ქოთქუასჷნ, მუთ რე გილახა ზმორინი? ინა გოთმახაფაჩენს ადამიერს, ღარჯილს ინუმბარანს, მენდის არძენს. უკულ ხოლო, ვათმოხვადუნო, ნამდა ნამთინეშახ ზმორინ ეთმიალე კოჩჷს? მუ რაგად ოკო, მარცხას, მარა იშენთ ეთმიალე...ამარ ათეშ წიმახ კურსკიშ ვაგზალს ართ გაგესქუაქ ხო ჟიროშ ვითოშ მანათ მიგუ,-ხაჩა გაგესქუაქ!
ცირასქუას თეშ უკინებუდუ დუდი, ითამ ირფელ თეს ბანჩალა ციგანუათ მეთმირჩქინანდუკო დო დუდჷს ანჯას გეთმიორინუანდუ, ნამდა თიშა მიკუჯინუდუკო დო გუძიცინუდუკო, მა ხოლო, ითამ მუთუნ ვამარჩქილედუ, პასიანს „ნაპოლეონს“ გოთმოვფაჩუნდი. ართჷშახ მამაქ უმოს მიკი გემშაჩურუ,-ჩქიმდე გჷგნურქინუ დუდჷს დო თქუ:
-ალბეთ, თე ბოშკოჩი ზმორინენს, ამდღა ივაფუნო დო უკულ, მუაჩქიმ დოღურუ დო ფარა დუდჷშა გიოციმალ მაღვენუნია, მარა ფარა ვადოსქიდუ დო დუდჷშა მუს გირღვანს, ბძირათ. მუამუშის, მუ რაგად ოკო, ართბურცხა მუდგაინ უღუ,-სამანგათ აკავითოში დესეტინა დიხა სამარაშ გუბერნიას,-მარა, მუჭო მიჩქუ, სქუას ვადუტენს, მუდა იშეიშენთიდა ვანდღულუ მუმაშ ჸოროფათ, დო, მუჭო ვოტყუქჷნ, მაართანი მათაგა ებედუყუ დოდირთუ... 
თე დასაუკუნი, ჩქიმოთ უგუჭყოლადუ ჩიება პეტრეპავლობა დღაშ წოხლიან ონჯუას მივრჩქილე. თიმ ორდოს მამაქ ეკლესიაშა მიდართუ, თეურეშე ხოლო-გუბერნატორიშ დღარ ხუებაშა. საქვარდღალეფს იშენთ ჸუდეს ვაჭკომუნდუ მუთუნს, თაშ ნამდა, თი დღას ხოლო სუმჷქ ქიმლივკაკალეთ ხვალე. მილაკაკალუაშ თებას ლილიაქ, მუჟამს საჸოროფო შარშალიშ მანგიორო ქვიშნა ბულიშ ჩემჰვა ქომუზოჯინუეს, ჸუჯიშმარხვალ რკიაფ გეტახუ, გურის უღაჭალუდუ, შუფელს კიპილია ლიკვეფს გეთმიაშქვანდუ. უკულ ფინიასენ მერჩელჷშა გეგნაჸოთუ, გვალო ცანცალჷქ გეიჸოთუ დო გეგნოფიჩონდუ. ძიუდოღურათ ქემიპონით სენაშახ,-ქურცეფს იქირინუანდუ, ხეს მაჩამუდეს,-ვუძგიძგინეთ, ნამდა დარჩქალებედუკო, ქეშვეპიჯით, ნამდა გაგესქუას კონწარულო დავსაჯენთჷნ; უკულ, მუჭოთიჸუ ქოდიპუნეთ დო ქოდირულუ. მუსხი ბაძგიერ სვისვინს მარძენდეს ოკონდა თინა, ნამდა ჟირხოლო ართო ვლამენდით ქემემიჸონაფუდესკო ონჯირუშახ. ინა ხოლო, წა-წამს მიკმადვალუდუ ართიანს ჩქინ ხელეფი! გალე ჭვიმა ჩხაპალანდუ, დოუკმელებურ სენეფს კალკალეშა ეთმიორძანდუ ვალუა დო ტყვაც დო გურგინჷშე ჟურჟინი მეუღუდუ შუკუმეფს. скачать шаблон для dle скачать бесплатно фильмы