წუხილი
ყველა რაღაცას მპარავს და მართმევს,
შენ რომ წახვედი, ბევრი ვინანე,
სული ობოლი- გუგულის მართვე-
ვცადე და ვერსად დავაბინავე.
არის კლება და არა მატება,
ღმერთო უძლური რად გამაჩინე,
გადაარჩინეს რომი ბატებმა,
მე ვერაფერი გადავარჩინე.
დარი იყო და უცებ გაწვიმდა,
სოფლის ბილიკზე მივალ ნაგვემი,
სადღაც, ხის ტოტზე, მიცდის ნარჩიტა,
მაგრამ ვერაფრით ვერ მივაგენი.
გაშეშებული დგანან ვერხვები,
მე კი მივყვები დროთა დინებას,
სადმე, გზის ბოლოს როცა შემხვდები,
ორივეს მწარედ გაგვეღიმება.
არის კლება და არა მატება,
ღმერთო უძლური რად გამაჩინე,
გადაარჩინეს რომი ბატებმა,
მე ვერაფერი გადავარჩინე.
დააფიქსირეთ თქვენი აზრი